【中醫暗瘡專線 #2 】經前長暗瘡係腎熱！？咀邊生瘡要通便！？你的臟腑如何、你的暗瘡位置也必如何
中醫有所謂「有諸內，必形諸外」，意思就係「你的臟腑如何，你的外表也必如何」。如果面部皮膚係同一個位置反覆出現暗瘡，其實係身體比你嘅提示！
1️⃣ 額頭 → 心
此位置暗瘡反覆發作，代表患者屬於「心火旺盛」。除咗生暗瘡之外，亦會容易生飛滋、口乾咽燥、壓力大、精神緊張、易心跳心慌、睡眠質素差。
呢類人士應減少攝入咖啡因，包括濃茶、咖啡、朱古力等。因為心火旺盛者，容易被咖啡因影響睡眠質素，繼而使工作壓力、精神狀態更差；這樣會形成負面循環，加重暗瘡情況。
🍜 飲食建議：五味子茶、蓮子百合湯
👩🏻⚕️ 作用：清心安神
2️⃣ 鼻頭 / 鼻翼 → 脾胃
此位置暗瘡反覆發作，代表患者屬於「脾胃積熱」。患者容易有口氣、胃氣，成日口痕想食野，皮膚比較油膩，腹脹滿悶，大便黏笠、氣味重、有痾唔乾淨嘅感覺。
呢類人士要特別注重飲食調攝，戒口十分重要（可參考第一集嘅飲食建議）。注意少食肥膩、熱氣食物！平時亦要記得保持腸道暢通，多飲水、多纖維！
🍜 飲食建議：冬瓜薏米茶、鮮魚腥草茶
👩🏻⚕️ 作用：清熱祛濕、舒緩皮膚紅腫
3️⃣ 左面頰 → 肝
中醫理論中，「肝木生於左宜升」。如果肝氣不舒，升發太過，就有機會係左面頰出現紅疹／暗瘡。
呢類人士常見「肝氣鬱結」，容易忟憎、情緒鬱悶、易發脾氣、常唉聲嘆氣，容易頭痛、胸悶脅脹、口乾口苦，女士易有經期不適。
平時要注意保持情緒平和，可以考慮睡前靜觀／打坐或其他舒壓方法。日常應保持充足休息。
🍜 飲食建議：玫瑰花、夏枯草
👩🏻⚕️ 作用：疏肝理氣、清肝明目
4️⃣ 右面頰 → 肺
人體正常氣機係【左升右降】的，當「肺氣鬱結」者係身體右上方出現肺氣停滯不降嘅情況，就有機會係右面頰出現紅疹暗瘡，另外亦容易係胸、背生暗瘡。
此類患者常見皮膚痕癢、乾燥脫屑，常見口乾聲沙、大便秘結。日常飲食要注意，少食辛燥食物，例如辛辣、煎炸烤焗嘅食物；煙草亦屬辛燥之品，易損傷肺部津液，令皮膚暗啞不華。
飲食建議：蜂蜜水、天麥冬茶、竹蔗汁
作用：養陰潤燥、潤肺生津、亦適合秋季去痰火除燥咳
5️⃣ 下巴 → 腎
下巴生暗瘡常常同「腎熱」相關，呢類人士往往日夜顛倒、壓力大，或正值青春期。腎熱嘅女士常常係月經前長出暗瘡，完經就會消退。另外，有機會出現夜間口乾煩熱、失眠、盜汗等伴隨症狀。
如果症狀持續、女性有明顯嘅月經不適（月經紊亂／經量過多或過少／痛經／血塊／乳房脹痛等），建議應向專業醫師就診！
🍜 飲食建議：玫瑰花、枸杞菊花茶、桑椹乾
👩🏻⚕️ 作用：滋補肝腎
6️⃣ 唇周 → 胃、大腸
中醫經絡系統中，胃經及大腸經都會循經唇周。如果「胃火熾熱」，或者腸道「濕熱蘊積」，就容易係唇周生暗瘡。
呢類朋友容易消化不良，易肚瀉（俗稱玻璃肚），大便易爛而且氣味臭，或者容易便秘。平時要注意飲食，少肉多纖，少食生冷，少食／飲奶類製品，多飲清水。
🍜 飲食建議：火麻仁，蘆薈汁，土茯苓湯
👩🏻⚕️ 作用：潤腸通便、清熱解毒袪濕、紓緩皮膚痕癢
中醫治療暗瘡
