【中醫冷知識】 Lady Gaga, Justin Bieber, Victoria Beckham加持！古人用口吸拔罐？ 由罐斑分析健康狀況！
受到一眾荷里活明星及運動名將喜好，由Lady Gaga, Justin Bieber, Victoria Beckham去到泳將菲比斯、NBA球星庫里，到底拔罐有咩神奇魔力？ 原來，古人最早應用拔罐療法，係治療局部皮膚瘡癰。佢哋會係牛角筒上面磨一個細窿，然後將佢罩喺瘡面吸排膿血，有利傷口癒合。而呢種方法漸漸應用到其他疾病，例如痛症、感冒、保健調理等。
拔罐原理 - 古人用口吸？😨
拔罐嘅原理係製造罐內負壓、令罐吸附係皮膚上面。最初，古人的確會用口吸走罐內空氣，但後來已改為利用熱力製造負壓（例如以熱水浸泡竹罐、或利用火燃燒罐內空氣）。
到近年，市面亦出現抽氣式拔罐及矽膠拔罐，呢啲發明就方便病人自行係家居使用。
拔罐一般會應用係肌肉豐厚部位，如背部肌肉上（足太陽膀胱經），透過豐厚肌肉層來保護重要血管及器官。
拔罐的4大好處
傳統中醫學角度認為，拔罐具疏通經絡、行氣活血、通痺止痛嘅作用。另外，拔罐時會令皮膚腠理打開，所以亦有疏風散寒祛濕嘅作用。主要好處有以下4點：
▪️ 促進血液循環、增加新陳代謝： 拔罐會讓皮下產生血管擴張、充血嘅過程，可以加快血液循環及新陳代謝。
▪️ 提高身體自我修復的速度： 透過讓微血管破裂，產生溶血現象，加強免疫系統嘅吞噬作用，加快身體自行代謝舊或受傷的細胞嘅過程。
▪️ 可針對局部問題： 拔罐能針對身體局部嘅不適去進行治療，例如上背嘅肌肉/筋膜沾黏，可透過拔罐加強局部微循環，舒緩病症。
▪️ 舒緩疼痛： 拔罐可負壓，可輕微拉起淺層肌肉及皮下筋膜，好似幫佢地拉筋伸展咁，可以有效舒緩軟組織疼痛。
拔罐的3大適應症
▪️ 痛症：針對頸椎病、肩背腰腿痛、坐骨神經痛等痛症，拔罐可即時有效舒緩痛楚。
▪️ 感冒：感冒前期出現的背部發緊、發冷，一般接受一至兩次拔罐治療便見效；若已出現更多感冒徵狀，則需做二至五次治療。
▪️ 肺系病：咳嗽、氣管敏感、哮喘。在中藥配合拔罐的治療方案下，可得到更好的療效。
要注意，以上病症雖然適合使用拔罐治療，但仍須由醫師臨床診斷為準，並可能需要配合其他治療方法。
分析罐斑看健康狀況
拔罐除左具有治療作用，亦可輔助醫師作臨床診斷。醫師可透過觀察：拔罐後皮膚上出現嘅罐斑、甚至拔火罐後罐內水氣嘅形成，從而判斷病人嘅身體情況。
🔴 紅色、好快消散：正常
⚫ 偏黑：血瘀
偏紫黯：寒凝血瘀
⚪ 偏淡白無色：局部氣血較為虛弱
🏁 顏色深淺不一：氣滯血瘀 要
注意，罐斑只喺其中一個參考因素，臨床上亦要考慮病人症狀同埋四診表現，才可以作更準確判斷。
拔罐時間及方法
除咗局部留罐，針對唔同症狀、部位，拔罐方法都有唔同。主要有以下幾種：
▪️ 留罐：拔罐後留罐5-10分鐘，係最常用方法
▪️ 刺絡拔罐：快速針刺患處皮膚至少量出血，再於上面留罐吸出血液，常用於急 性跌打損傷（如咬柴）、痛症等
▪️ 閃罐：拔罐吸付係患處後迅速取下，反覆操作十數次乃至數十次，直至皮膚泛紅
▪️ 走罐：先係拔罐部位搽一層 BB 油，拔罐後醫師會手握罐底慢慢於皮膚上來回推移，反覆數次，直至皮膚潮紅「起痧」，呢種方法會稍有痛楚
▪️ 留針拔罐：醫師先於治療部位施針，再係針上拔罐，加強針刺療效
▪️ 藥罐：根據患者症狀，於罐內搽上藥液，增強療效
注意事項
雖然拔罐療法安全性高、被譽為「綠色療法」，但仍建議由專業醫師進行治療，及遵守以下幾項注意事項：
▪️ 心臟病、血友病、皮膚潰瘍、破裂或敏感、有高度水腫問題、高燒不退或非常消瘦者，不宜進行拔罐治療
▪️ 體質較虛者，拔罐頻率不宜多於一周一次
▪️ 留罐時間不宜多於10分鐘
▪️ 拔罐後2小時內不宜洗澡或游泳
▪️ 進行任何治療均應先諮詢醫師意見
