健康資訊

【肌礎教肉#5】 肩膊痛小心肌腱發炎!2種肩膊檢查DIY!

最近有位病人因膊頭痛就診,懷疑自己係肩周炎。病人無論舉手、著衫甚至拎袋都會出現疼痛,痛楚會由膊頭去到手踭,情況持續咗兩星期。試過痴膠布、搽藥酒、按摩槍,全部都無用。

👨🏻‍⚕️ 肩膊痛 = 肩周炎?

肩周炎最明顯嘅病症就係肩膊疼痛及活動能力減退,慢慢變得僵硬。但同樣嘅病症,其實亦有機會係肩旋轉肌群受傷,較常見嘅係「肱二頭肌肌腱炎」。要分辨兩者,醫師通常會指引病人做特定動作檢查,嚴重者需要進行影像檢查。

完成簡單測試,再加上一輪問診後,陳醫師診斷病人係「肱二頭肌肌腱炎」。兩個測試如下:

👨🏻‍⚕️ 「肩關節內旋測試」

  1. 將患處手臂伸向後背
  2. 曲起前臂、伸向另一邊肩胛骨(俗稱雞翼骨)
 

如果過程有痛楚出現、或者手指觸摸唔到肩胛骨下緣,就代表肱二頭肌肌腱有問題!

👨🏻‍⚕️ 「肱二頭肌對抗測試」

  1. 將患處手臂向前下方45度伸直

  2. 搵另一個人幫手,係病人前臂位置向下壓

  3. 病人同時保持手臂伸直、向上用力、對抗對方向下嘅壓力

如果過程有痛楚出現、或者手指觸摸唔到肩胛骨下緣,就代表肱二頭肌肌腱有問題!

👨🏻‍⚕️ 肱二頭肌肌腱炎

肱二頭肌主要參與手肘屈曲及手臂前伸嘅動作,容易係運動過程受到急性傷害、或係生活中受到慢性傷害。

急性傷害一般發生係運動中瞬間力量爆發,造成拉傷或撕裂,容易出現腫痛,伴隨一段時間嘅劇烈疼痛。

慢性傷害一般指日常生活中,重複性動作造成過度使用肱二頭肌,令肌腱乏力及發炎,演變成肌腱炎。包括訓覺時摺埋隻手訓、長時間彎曲手踭等。慢性傷害造成嘅發病速度較慢,疼痛會隨工作量增加而逐漸嚴重,最後出現沾黏情況。

👨🏻‍⚕️ 三大肌肉症狀:疼痛、緊繃、無力

疼痛:多數發生於肩膊前側,無用力都會出現痛楚

緊繃:發炎時,肌肉會有防衛性嘅收縮,情況持續就會出現緊繃僵硬

無力:發炎後會出現沾黏,造成活動能力變差及肌肉無力

👨🏻‍⚕️ 認識肌腱

肌腱與肌肉屬於不同嘅身體構成部分。肌腱係連接肌肉同骨骼嘅橋樑,當肌肉收縮時,肌腱就會帶動連接的骨骼,三者一齊活動。

如果肌腱處於發炎狀態,肌肉發力或做某種角度嘅活動時,會刺激發炎肌腱而引起疼痛。以肱二頭肌肌腱為例,佢係連接肩胛骨和前臂橈骨。當肱二頭肌肌腱處於發炎狀態,我地進行肩膊活動時,就會出現疼痛。

👨🏻‍⚕️ 「痛」與「不痛」

「痛」係身體俾你的訊號,代表身體有發炎嘅情況。痛咗一排後「不痛」,代表發炎情況已經減緩或已消炎,但唔代表身體組織已經修復、或造成問題嘅根源已經治理好。往往病人容易復發,就係因為覺得唔痛就等於好返哂,而無去正視問題根本。

👨🏻‍⚕️ 中醫治療

陳醫師以針灸、局部配合電針治療,治療後於患處以輕柔力度稍作按揉,並囑咐病人多休息,幾日後返嚟覆診。

覆診時,膊頭已經輕鬆好多,舉手、著衫已經無咩問題,只係稍為壓到會唔舒服。於是,我繼續同樣嘅治療方法,下一次病人已經無出現痛楚。往後只需定期覆診,處理積累已久嘅肌肉緊張問題,已可痊癒。

中醫治療肌腱炎,除咗針灸或推拿治療外,嚴重嘅病人會同時配合中藥內服外敷,加強療效;另一方面,病人亦要多休息、減少活動。

建議病情穩定後,病人先再做伸展拉筋運動,改善關節活動度。切忌操之過急,於病發早期做太多運動,反而會加重病情!

Author : 陳泳豪 註冊中醫師

香港大學中醫學碩士(內科)畢業,曾就職於醫院管理局三方協作中醫診所,豐富臨床經驗,專研肺系病(咳嗽、哮喘、鼻敏感)、脾胃問題(胃病、食慾不振、便秘、泄瀉、腸易激綜合症)、皮膚科(蕁麻疹、玫瑰痤瘡)。 學歷豐富,包括香港大學中醫學碩士(內科)、香港大學中醫全科學士學位、香港理工大學綜合康復治療課程、香港大學家庭醫學及基層醫療學系社區精神醫學證書課程、香港老年學會實用老年病學證書課程、香港急症醫學會緊急醫學課程、香港中文大學專業進修學院腫瘤學證書課程、香港大學專業進修學院經方臨床應用培訓課程。

發佈留言

發佈留言必須填寫的電子郵件地址不會公開。 必填欄位標示為 *