多囊卵巢綜合症：連續7年每日下陰少量出血 3個月中藥加針灸 回復月經周期
臨床上，我有好多年輕病人都話我知，原來係佢地青春期嘅時候，已經開始出現月經唔準嘅情況。我有一位22歲嘅女病人，15歲就診西醫婦科，西醫懷疑佢係多囊卵巢綜合症，所以處方避孕藥俾佢。直到18歲，西醫幫病人安排進行盤腔超聲波檢查，才終於確診係多囊卵巢綜合症。
由15歲到22歲呢7年，病人一直服用避孕藥及荷爾蒙藥調經。但係，病人每次停藥，就會下陰每日出血。除咗月經不規則之外，病人平時情緒起伏較大，前額及鼻翼兩側常生暗瘡，而體型屬於中等身材。
就診時，我建議病人考慮暫停服用荷爾蒙藥，先用中藥治療及堅持一段時間。病人起初因為以前就診其他中醫嘅經驗，所以唔太願意停藥。但考慮到一直服用荷爾蒙藥調經，其實每次停藥仍然有下陰出血嘅情況，所以最終同意治療方案。
病人服用第一星期嘅處方後，覺得出血量有減少，大約每日一個硬幣嘅月量，偶然會有血絲或啡色分泌物。持續治療1個月後，下陰出血嘅情況已經停止。第2個月起，病人連續2個月都有月經來潮，但經期持續11-12日，經期及周期都長過正常月經。所以，病人現在仍在持續治療，希望將周期由約54日減至28-30日。
而呢段治療時間，病人係一直都無服用荷爾蒙藥或避孕藥。
什麼是多囊卵巢症？
多囊卵巢症係一種十分常見嘅內分泌疾病，好發於正值生殖年齡嘅女性。大部分患者嘅症狀會由青春期後期或二十多歲嘅時候開始發現，但多數患者只會出現以下1-2項症狀：
- 經期紊亂：由於患者的卵巢不排卵或排卵次數減少，會造成經期次數疏少甚至沒有月經、或者持續下陰少量出血，嚴重者會不孕
- 肥胖或超重：脂肪通常會分佈於腹部周圍，形成蘋果身形
- 多毛症（體毛過多）：過多的體毛可出現於面部、胸前、腹部、乳房、拇指及腳趾
- 暗瘡
- 卵巢增大：卵巢的卵泡數量增多，甚至使卵巢增大1.5倍至3倍
多囊卵巢症的成因
從現代醫學角度，多囊卵巢症嘅成因相信係多個因素相互影響，包括內分泌、新陳代謝、先天遺傳和環境。此病主因係由於腦部釋出過多促黃體激素、刺激卵巢分泌過量雄激素，造成荷爾蒙失調。由於雄激素過多，引起經期紊亂、多體毛等症狀。
我有多囊卵巢症嗎？
要怎樣才知道自己有沒有多囊卵巢綜合症呢？
第一，經期紊亂、次數疏少甚或沒有月經嘅情況。呢個情況代表你已經有排卵減少或唔排卵嘅問題，建議要進行驗血及婦科身體檢查。
第二，雄激素過多。你可以留意自己有無雄激素過多嘅症狀，包括多體毛及長暗瘡。另外，你亦可以透過驗血，得知自己嘅雄激素水平會否過高。
第三，卵巢出現增大或多囊。通過超音波掃描，醫生可以觀察卵巢有無增大或出現囊泡過多。正常情況下，位於卵巢表面的囊泡大約有10個以上，直徑由6毫米至8毫米不等。而多囊患者，其中一個或兩個卵巢，會大約比正常的卵巢大三倍左右。
就算你有以上其中兩項嘅症狀，仍然要排除甲狀腺失衡、卵巢腫瘤或其他內分泌問題。所以，建議有疑慮嘅話，要盡快進行驗血或者超音波檢查。
多囊卵巢症的治療
從現代醫學角度，一般會建議患者服用避孕藥來減少雄激素。另外，亦可以使用雌激素藥物，抑制雄激素嘅活動。同時，都會建議患者透過運動減肥，保持健康體重。
從中醫角度，有一些內地的學者曾經做過一些研究：他們找了大概三十個多囊卵巢綜合症患者，進行3個月嘅中藥及針灸治療。透過比較治療前後嘅數據，發現大約80%患者有明顯改善：(1) 卵巢體積縮小、(2) 卵泡的數量減少、(3) 荷爾蒙水平亦趨近正常。
中醫治療
從中醫角度，多囊卵巢症嘅治療一般會先以調經為主要目標。月經失調嘅患者，一般與腎虛、脾虛最為相關，同時可能加上肝鬱、痰濕、血瘀等因素，造成子宮脈絡受阻。
治療手法上可分為2種：
-
中藥治療
透過處方中藥，可以促進卵泡成熟及排卵，從而重建月經周期。其中一種方法 – 「周期療法」，係指仿照月經週期進行治療。
第一周 – 經後期：以補腎健脾、滋陰養血嘅方式，促進卵泡發育；
第二周 – 排卵期：以活血化瘀嘅方式，促進排卵；
第三周 – 經前期：疏肝理氣，幫助黃體發育，預備月經到來；
第四周 – 行經期：以活血調經為主，幫助月經正常來潮。
-
針灸治療
針灸有促排卵嘅作用，令卵子排出更順𣈱。
療效及時間
一般而言，中醫治療多囊卵巢症的第1-2個月可以明顯改善月經問題，第3個月起以回復正常月經周期及穩定病情為主。診所大部分多囊卵巢症都可以成功調經，無須再服用避孕藥，而部分病人更加會成功懷孕。所以患者千萬唔好氣餒或者灰心，應該積極求醫哦！
