抗疫抗炎superfood可信嗎？

抗疫抗炎superfood可信嗎？

市面上有好多健康食品標榜抗炎抗疫，或者一啲補肺抗疫嘅藥方、湯水，但其實一樣食物能否增強個人抵抗力，係需要判斷個人體質加上該樣食物嘅性味是否能達到體內寒熱陰陽嘅平衡。因此，好難講一種食物就通用於每一個人，而應該理解呢種食物適合邊種人嘅邊種病。呢個就係中醫提倡嘅原則：「辨證論治」。

例如最近標榜可以抗炎嘅薑黃，薑黃屬於辛、苦、溫嘅藥，功效主要係活血行氣，通經止痛。薑黃的確有抗炎作用，但炎症同時要分寒熱虛實。今次嘅新型肺炎，屬性與熱、濕、瘀、毒比較相關。如果熱症用熱藥去治，再加上如果患者體質係偏熱，會使病情變得更嚴重。因此，薑黃可以抗炎，但唔係對每個人都有用。

除左薑黃，其實最近仲有一隻藥係非常常用，可以為大家介紹一下。

新型肺炎普論都會出現咳嗽氣喘嘅情況，加上一般人亦因天氣轉冷而多咳。乾咳氣喘雖然唔一定係新型肺炎，但持續咳嗽（久咳）就多與氣管敏感相關。臨床上大部分病人都係在飲用咳藥水、抗生素、消炎藥呢類寒涼藥物後，加重表虛寒，導致喉嚨痕癢、反覆咳嗽。而「麻黃」用於呢種虛寒型嘅久咳，係非常有效嘅。

從現代醫學角度，麻黃對中樞神經系統中控制咳嗽部分，有抑制嘅作用。而從中醫角度而言，麻黃係有發散風寒嘅功效，止咳之於更可以治氣喘。甚至係中醫治療新型肺炎嘅三種常用藥方中，均有使用麻黃！

但要注意，麻黃屬於有毒性嘅藥物，而且用前必須清楚自己是否屬於虛寒型久咳，因此建議大家都應先向專業醫師諮詢。中醫其中一個治病原則係透過調節個人體質以增強正氣，正氣足則外邪難以入侵。在未病時就增強體內正氣，或在有輕微病徵時就求診，才可以有效預防患上嚴重疾病！