疫苗快醫通

COVID後遺症大補帖!自救小食療擊退咳嗽、腦霧、無胃口!

潘健燊醫師每日幫助超過 30-40 位患者治療 COVID-19,除了陽性確診患者外,也有不少康復期的病人就診,原因往往是他們轉陰性後病徵仍然持續很久。這就是常見的COVID後遺症!

💡 為什麼COVID有後遺症?

臨床所見,大部分中咗COVID-19 嘅病人處於外「寒」、裡「熱」、夾「濕」嘅狀態,令身體出現尖寒尖凍、發燒、頭痛、週身骨痛、喉嚨痛、咳嗽痰多、作嘔、大便稀爛等現象。

經過幾日中藥療程去散外寒、清肺熱、化脾胃濕濁後,正氣較好嘅病人會回復正常身體狀態。

但由於體質、飲食、天氣、情緒等因素,部分病人身體會出現「餘邪」未清晒嘅情況,例如週身乏力、呼吸困難、胸痛或胸悶、咳嗽、食慾減退、記憶力減退(腦霧)等持續性症狀。

💡後遺症 1️⃣ – 咳嗽 😷 大部分病人患上COVID-19 時,肺熱熾盛,熱邪灼傷肺部嘅津液,煉津成痰液,令肺臟失去正常宣發肅降嘅功能,造成咳嗽。根據唔同病人嘅體質,有部分病人係康復期亦會殘留唔同證型嘅咳嗽。

💡後遺症 2️⃣ – 記憶力減退(腦霧)😵 COVID-19 令病人體內痰濕積聚,加上春天外界嘅濕氣旺盛,進一步影響脾胃「升清降濁」嘅功能,令陽氣唔能夠升發同滋養頭腦同埋眼部,而痰濁亦容易蒙閉心神,造成視力模糊、頭暈、耳鳴、甚至記憶力減退等一系列嘅「腦霧」現象。

💡後遺症 3️⃣ – 食慾減退 🤢 中醫角度認爲,脾爲生痰之源,COVID-19 令脾胃功能減弱,積聚濕邪,影響消化功能,造成嘔吐、肚脹、食慾減退、大便稀爛等症狀。要改善康復期食慾減退嘅症狀,最重要就係要將脾胃剩餘嘅濕濁之邪清走。

➡️ 氣陰兩虛型咳嗽: 🔺常見症狀:乾咳無痰,或痰少而難咳出,手腳心熱,容易出汗,講嘢或行路唔夠氣,口乾鼻燥等

🔸 潤你個肺止咳湯:

材料:太子參4錢,天津雪梨2個、南杏仁3錢、北杏仁3錢、枇杷葉3錢、川貝母1兩

做法:先將梨去皮,將中間梨心挖走,其他材料全部洗乾淨,川貝母先壓碎少少,放入煲內,加8-10 碗水,大火滾後轉中細火煲45分鐘

功效:益氣養陰,潤肺化痰

➡️ 脾虛痰濕型咳嗽:

🔺 常見症狀:

痰多色白或有泡,喉嚨痕癢,比較怕凍,容易胃脹、無乜胃口、多數夜晚咳得犀利過日間

🔸 健你個脾化痰湯:

材料:新鮮淮山3 錢、生熟薏米各3錢、白朮3錢、陳皮2錢、瘦肉1斤

做法:瘦肉先出水備用,淮山去皮切塊,陳皮洗淨刮囊,連同其他材料,放入煲內,加8-10 碗水,大火滾後轉中細火煲45分鐘

功效:補氣健脾、化痰袪濕

➡️ 按摩 四神聰穴+百會穴 💆🏻‍♂️

【會穴】頭頂正中央位置

【四神聰穴】頭頂正中央,前後左右各一寸處(大約拇指寬),總共有四個位置

做法: 5個穴位輪流用中指各按三次,每次五秒

功用:健腦益智、養神開竅、改善記憶

➡️ 開胃茶療【香薷陳皮飲】

材料、做法:

陳皮10克,香薷6克,冰糖適量。

加入300ml滾水沖泡代茶飲。

功用:理氣和胃,芳香化濕,適用於食慾不振嘅COVID-19 康復期人士。

Author : 潘健燊 註冊中醫師

海外回流註冊中醫師,畢業於香港中文大學中醫全科碩士學位,具豐富臨床經驗。專研內科中藥調理、痛症針灸及浮針治療、婦科、情志病、皮膚科等。臨床研究範疇包括:針灸治頭痛、坐骨神經痛、肌肉扭傷、關節炎、腸胃不適、婦科(經前緊張症候群、月經不調、痛經、功能性子宮出血、白帶異常、妊娠嘔吐、閉經)、情志病(鬱證、失眠)。