情志病|失眠

【焦慮症|失眠手震心跳急】壓力爆煲反被老細責怪 打工仔患焦慮症 3次針藥改善失眠

孫頴儀醫師有一位朋友,因為夜晚要典2-3個鐘先訓得著、訓得幾個鐘又好易醒,所以長期都好攰,於是就診孫醫師。係問診過程中,孫醫師發現病人同時有胃口差、容易緊張燥底、心慌心跳急及手震等問題。
 
因為病人都察覺到自己手震、心跳急等症狀,所以做了身體檢查,檢查顯示病人係無心臟或甲狀腺問題。
 
孫醫師對病人失眠嘅根本原因再深入問診,發現自從工作越黎越繁忙、加上老細對佢請假休息頗有微言,一諗到要返公司已經開始手震及心跳加速。但係,如果個排無咁忙,症狀又會稍為緩解。

孫醫師初步判斷病人屬於焦慮症,由於病情暫未對日常生活造成大影響,病情尚算可透過中醫治療去控制。所以,孫醫師建議病人嘗試中藥加針灸治療一個月,觀察症狀變化。萬一這期間,症狀沒有改善或甚至惡化,就建議要就診精神科專科醫生了!
 
係3次針藥治療後,病人表示:「以前我訓上床會feel到好大力好急嘅心跳,就算好攰都好耐先訓得著,未天光又扎醒。依家癱上床,我諗 20 分鐘以內已經訓著咗,無咗心跳好急嘅感覺啦!」
 
見到朋友變得有返啲精神,孫醫師自己都好開心。由於治療以改善症狀為先,用藥及落針嘅方向都係安神、疏肝為主。所以醫師亦建議朋友,要每 1 星期做 1 次帶氧運動或者 1 次靜觀療法,幫助調節心理壓力,達到標本兼治。

【訓得著 = 沒有失眠嗎?】

 

原來失眠唔止「全晚眼光光」1 種!另外 3 種包括:
 
(1) 入睡時間 > 1 小時
(2) 難維持睡眠時間、淺眠易醒、難再次入睡
(3) 再夜訓著都往往比預定早 2 – 3 小時已經醒來、難再次入睡
 

以上 3 種睡眠品質差,所以醒返之後往往會無精神、頭暈頭痛、記憶力差。

【壓力大 = 焦慮症?】

 
你有壓力、我有壓力,我地就有焦慮症嗎?不是的!
 
焦慮症主要病徵係長期擔心害怕某些事物,而且因這些情緒持續不退而出現壓力反應:
 

精神方面:

(1) 經常感焦慮、過份擔心、暴燥、緊張
(2) 明知不該過度擔心,卻無法克制焦慮
(3) 失眠、易發惡夢、疲倦
(4) 精神不能集中、坐立不安
(5) 不能自我肯定,覺得自己一定做得不好
 

生理方面:

(1) 心跳加速、耳鳴
(2) 肚瀉、腸胃不適
(3) 手震、出汗、肌肉緊張、肌肉痛
(4) 頭痛、頭暈
(5) 口乾、呼吸急速、喉嚨梗塞
(6) 小便頻密
(7) 女性經期不規律

【睡眠 ⇌ 情緒】

 
研究顯示,充足睡眠對腦部穩定分泌多巴胺十分重要,但偏偏情緒問題又會影響睡眠質素。孫醫師建議,可以透過運動、靜觀、中藥、針灸等方法,同步改善睡眠及情緒,令兩者形成正面循環、相輔相成。

【頭皮針增加多巴胺分泌】

 
「方氏頭皮針」,係透過在頭部刺激點上針刺,治療全身疾病嘅新型針灸療法。此療法採用中醫全息理論(身體局部位置可對應全身部位),並有西醫頭部解剖學嘅刺激點理論支持。
 
方氏頭皮針具有止痛、消炎、鎮靜、解痙、降壓、止癢、抑菌、強心、急救等功效,特別是對運動、神經、循環等相關疾病療效極佳。
 
在治療睡眠及焦慮症上,頭皮針可以增加大腦調節情緒部位嘅供血量(人體腦部前額葉、杏仁核及海馬迴),讓大腦釋放出更多穩定情緒嘅荷爾蒙,如多巴胺,有助改善情緒及睡眠質素。

【情緒急救第 1 式】按摩穴位 💆

 
打圈按摩以下穴位,按到穴位有少少酸嘅力度為之適中,按3-5分鐘。
 
(1) 鎮靜穴:神庭

位置:額頭正中間、髮際線向入半個手指頭

功效:鎮靜安神,適合入睡前按摩

 
(2) 開心穴:神門

位置:無名指及尾指中間,直落至手腕橫紋處,摸到一條突起嘅肌腱,肌腱靠尾指個邊嘅凹陷處,就係神門穴

功效:安神、清心熱,適合煩燥不安、嬲嬲地嘅時候按

【情緒急救第 2 式】花草浸浴 🌺

 
由於浸浴時,皮膚上微絲血管會擴張,可以將花草類植物嘅功效由表面帶至身體裡。而且,浸浴時血液循環會加快,可以更快將有效成份帶至身體各處,做到改善血氣、舒緩情緒的作用。建議可以加入以下植物:
 

🌿 薰衣草:

對皮膚有散風止癢嘅作用,仲可以鬆弛神經、紓解緊張情緒,有助入眠。要小心薰衣草藥性略涼。
 

🌹 玫瑰花:

有疏肝解鬱、改善脾胃嘅作用,仲可以消除疲勞、美顏護膚。屬性偏熱。
 

💐 合歡花:

有安神、解鬱、開胃、止痛等作用,對治療神經衰弱係十分有效。屬性中和。

Author : 孫頴儀 註冊中醫師

畢業於香港大學 針灸碩士,並取得綜合康復治療證書、臨床皮膚醫學證書、疼痛管理證書等。在婦科、痛症、皮膚病及情志病方面深造,對治療失眠、焦慮症、抑鬱症等有豐富臨床經驗。