情志病|失眠

瞓得唔好好易老!瞓得好3大條件 2星期擁有完美睡眠

瞓得著唔等於瞓得好,而瞓得唔好仲會好易老!瞓得唔好、成日無哩精神又或者忟忟憎憎,就梗係容易老。但到底點為之瞓得好呢?

診室實錄 (一)

醫師:瞓得好唔好呀?
病人A:OK呀!
醫師:一覺瞓天光?
病人A:唔係呀… 半夜醒一兩次囉…

診室實錄 (二)

醫師:瞓得好唔好呀?
病人B:OK呀!
醫師:一覺瞓天光?
病人B:係呀!不過發好多夢…
醫師:咁瞓醒精唔精神啊?
病人B:瞓醒仲係好攰架… 乜唔係人人都係咁㗎咩?

❓ 乜嘢叫做瞓得好 ❓

1. 瞓落床易入睡,唔洗典黎典去

中醫治療失眠分實症同虛症:「實則瀉之,虛則補之」。

🔸 炆憎型:俾同事老公仔女激親、炆憎到火都黎瞓唔着,呢啲係實証實火,要疏肝瀉火。

💡 小tips:可以平時飲水時,加d玫瑰花係水入面,有舒緩壓力、降肝火嘅作用。

🔸 潺弱型:日頭做嘢太忙太chur、夜晚雖然攰但都瞓唔着,可以參考返中醫一早有嘅「虛勞虛煩不得眠」呢個concept。呢啲情況屬於用神過度、導致心脾兩虛,咁就要補補氣血啦!

如果你攰到虛脫、但個腦仲係咁轉熄唔到機,咁醫師可以幫你加啲寧心安神藥,令你思緒平靜一啲,快啲「熄機」瞓着。

💡小tips:
多食桂圓、枸杞、紅棗,可以係湯水或飲用水中加入,或者當零食進食,對補氣血好有效!

2. 一覺瞓天光、瞓得冧、唔多夢

瞓得着只係瞓得好嘅第一步,完美嘅睡眠應該一覺瞓天光,瞓得冧、唔會半夜醒。

🔸 發惡夢型:有啲病人日頭返工不停開會,夜晚發夢又係開會。日頭開會就話人工包咗啫,發夢開會無人工收㗎!
又有病人會發惡夢扎醒。中醫理論指出,發夢其實係心火,可以透過中藥清心降火。

💡小tips:
多食蓮子、百合、苦瓜,或者買枝竹蔗矛根、雪梨茶,既可以清心火、又適合夏天降下火!

3. 醒咗唔賴床、精神滿滿

瞓覺嘅作用,其實喺俾個腦同身體好好休息,可以恢復精神同體力。瞓得好嘅話,醒咗應該覺得有精神,身心都ready去應付日間嘅工作同活動。

除咗以上所講嘅情況同原因,食得太飽或者餓住個肚、更年期或者其他疾病都會引致失眠。中醫治療失眠會根據辨証論治分虛實,效果顯著亦唔會做成依賴。

開頭嘅病人A及病人B,係經過1-2星期嘅中藥治療之後,終於擁有「完美睡眠」!朝早會自然醒,有股衝勁起身活動,唔需要再賴床… 最緊要,就緊係keep到個靚樣啦!

溫馨提示:
以上小貼示只適合症狀輕微人士,如果病情持續,記得搵專業醫師幫手呀!

Author : 曾嘉敏 註冊中醫師

取得香港中文大學中醫學院 中醫學碩士,擅長婦科、情志病、內科調理。