長期食安眠藥出現抗藥性｜5次針灸幫西醫減壓治失眠 暗瘡消失成意外收獲！

有一位20幾歲嘅女病人，雖然病人仲好後生，但原來已經失眠咗4年。病人每晚都會係床上面典黎典去，要1-2個鐘先瞓得著。最慘嘅係，病人一晚會醒3-4次，醒完又要1個鐘先瞓得返。計計埋埋，一晚得3-4個鐘瞓到覺。

病人到診嘅時候，最突出就係佢對又深又大嘅黑眼圈，再加上因為瞓唔好而成面生滿「壓力瘡」，未出聲都感受到佢平時好大壓力。

原來，呢位病人係一位西醫。病人讀緊大學時，已經因為學業壓力而失眠。後來係醫院工作嘅作息唔定時，呢一年仲有疫情加重負擔，令病人終於爆煲。

作為西醫，病人自己都有食安眠藥，但因為長期使用而出現抗藥性，依家食咗都訓唔到，所以就係同事介紹下就診。

醫師幫病人做一個全身平衡嘅針灸治療，除咗採用治療失眠常用、養心安神嘅穴位，再加上疏通局部經絡嘅穴位，從而調情達志、放鬆壓力。

持續治療之下，4年嘅失眠竟然係5次針灸治療中搵到出路。依家病人瞓上床5-10分鐘就瞓得著，唔會再瞓到一半醒返。甚至，連面上嘅暗瘡都退去。面色好咗、個人精神咗，心態都變得正面積極。

最後，呢位西醫病人同醫師成為咗好朋友，得閒會分享病案、互相學習，醫師都將西醫嘅知識用係中醫嘅診症上。

【中醫小知識】

中醫角度認為，人體嘅陰陽要調和，咁先可以瞓得好！所以，中醫會根據患者的體質、症狀及病因，將病人分為「實」、「虛」2種。

實症由肝鬱化火或痰熱內擾引起，虛症常見陰虛火旺、心脾兩虛或心膽氣虛。同時配合中藥或者其他手法治療，效果亦會雙得益彰。

由於中醫以治根本為主要目標，對病情長及反覆發作嘅失眠，療效相當顯著。