健康資訊

WFH後遺症「肥」 – 中醫減肥有效嗎?

Michelle 一開完個2個鐘嘅zoom meeting,即刻開咗屋企個包咸蛋魚皮提神!早排WFH日日都食好多零食,加上平時去開個gym room 之前又去唔到,Michelle喺半年時間重咗足足 20 磅 😱😱

肥,係人都知係食野過量、運動唔夠所致。另外,年紀大咗、新陳代謝減慢,都會令身體變成「易肥體質」。

 

原來,中醫角度睇肥胖都係一樣!從體質黎講,以下三種係最常見嘅:

3 種 「易肥」體質

1. 胃熱唔知飽型

胃熱係乜?就係不停想食嘢、唔知飽,好似有團火喺個胃度,食完轉頭又肚餓!

中醫減肥,首要係清胃火,即係控制胃口,令你唔再喪食。

2. 痰濕手腳重型

痰濕係乜?從中醫角度,多餘脂肪都係屬於痰濕,可以想像係又黏又杰嘅一pat 嘢。

當咁樣嘅物質充斥喺身體入面,氣血又點會行得順呢?所以,痰濕重嘅人會覺得自己手腳好重好墜,個胃成日又脹又滯。

呢類病人要注重化痰去濕,先可以令氣血行得通順,改善身體代謝,幫助減肥!

3. 氣虛無力型

中醫又認為「肥人多氣虛」。氣虛嘅人好容易攰、成日無精神,好似唔夠力推郁身體副engine咁。同時,身體機能亦會差啲慢啲,所以特別容易積聚脂肪。

針對呢類病人,中醫會幫病人「補氣」。氣夠,自然身體機能都好咗,減肥都可以減得快啲!

以上三種係中醫臨床上比較常見嘅証型,你可能係其中一種,亦可以三樣有齊。

另外,有啲人飲啖水都肥,可能係脾虛型或者脾腎陽虛型。

中醫減肥有效嗎

診所有一位病人,想喺準備婚禮期間減肥。醫師首先用咗中藥去改善體質、再用耳穴抑制食慾、配合針灸去加強局部循環。

最終係 4 個月內,幫呢位準新娘減走十幾磅。 其實醫師可以根據你的情況,制定最適合你體質同病因嘅方案,再加埋注意飲食同足夠運動量,一定會見到效果。都係嗰句,減肥無得急,持之以恆係最work!

Author : 曾嘉敏 註冊中醫師

取得香港中文大學中醫學院 中醫學碩士,擅長婦科、情志病、內科調理。