健康資訊

注意「提早更年期」 中藥治經期紊亂/潮熱/心煩氣燥

最近有一位女病人,一坐低就火爆爆咁話:「醫師,我今日好燥底,我燥到係巴士上面鬧人呀!」我當堂嚇一跳。

我叫病人:「你坐多陣,抖順條氣先~」

之後,我就開始問診了。發現呢位病人,除左突然燥底,近半年月經量逐漸減少,常頭暈頭痛(經前更甚),同時經常失眠,潮熱盜汗。西醫嘅婦科檢查表示無異常,亦斷斷續續就診不同中醫3-4個月,仍然無改善。於是,我同病人講:「你有機會係絕經前後諸症。」

絕經前後諸症,其實就係俗稱嘅「更年期綜合症」,一般會出現係45-55歲女性身上。係呢段時間,女性卵巢功能會逐漸衰退,伴隨雌激素水平嘅改變。

此類女性有機會出現一系列生理及心理的症狀,例如:月經紊亂、潮熱汗出、情緒急躁、心煩易怒、心悸失眠、眩暈耳鳴、抑鬱健忘、注意力分散、浮腫便溏、皮膚感覺異常、腰酸等。

千萬唔好以為更年期綜合症「捱過就好了」,症狀嚴重者可以出現月經失調、植物神經功能紊亂、血管功能失調、腫瘤易發及更年期憂鬱症!

唔係所有更年期女性都會出現症狀,大多數女性嘅症狀很輕,不知不覺就渡過咗更年期。但係,大約有10 – 15% 嘅女性症狀會較為明顯,需要醫治。此外,職業女性、或曾有月經紊亂、抑鬱症嘅女性,有較高機會出現明顯症狀。

女士們要小心,臨床上有不少個案,發現有機會出現「提早更年期」嘅情況。我就曾經有一位病人,年僅38歲,已經有停經數月、潮熱盜汗嘅情況。最後確診卵巢早衰,即提早進入更年期。

提早進入更年期,除咗會不孕,更加會使身體機能提早老化,令骨質疏鬆嘅情況更嚴重,同時影響心血管、生殖泌尿,有機會出現早發性阿爾茲海默症(俗稱老人痴呆)。

更年期雖然象徵身體老化嘅階段,其實係自然、正常嘅過程。但如果係提早更年期,則可以嘗試透過治療去延後呢個情況。

診所曾有一位病人,係42歲時已停經,西醫診斷後指出病人係更年期,雖然稍有提早但仍算自然。病人黎診所就診時,表示「就算要飲中藥、戒口唔飲凍嘢,我都唔要咁早更年期呀!」

最後,病人飲咗2個月中藥後,都黎返月經。雖然經期不定時,但如果間中食下藥,約40 – 60日都會黎1次月經,無須服用食荷爾蒙藥。

其實男士都會有更年期!大約係40至50歲時,男性體內雄性激素就會開始衰退,造成一定影響,例如脫髮及煩躁等。

講返呢位病人,我在診症後診斷病人虛實夾雜,肝腎虛同時有濕熱。所以處方了健脾祛濕清熱嘅藥物,以去實邪為主。

4日後覆診,頭痛頭暈及失眠嘅問題已經改善,證明實邪已去。第二次處方以平補肝腎為主、養陰為佐嘅藥物。服藥後,症狀明顯改善,心情亦逐漸變得平穩。

更年期係人體老化嘅正常過程,不需要用特殊嘅眼光看待,亦無須感到抗拒或尷尬,以免影響了治療!

Author : 陳碧葦 註冊中醫師

香港浸會大學針灸學碩士畢業,專研婦科(經前綜合症、月經不調、白帶異常、更年期綜合症);皮膚科(暗瘡、蕁麻疹、濕疹);內科(失眠、情志病、脾胃病)及針灸(痛症、中風病、淚水分泌失調)。

發佈留言

發佈留言必須填寫的電子郵件地址不會公開。 必填欄位標示為 *