食中藥治濕疹 會「發出嚟」？

食中藥治濕疹 會「發出嚟」？

潘醫師好多濕疹病人，以前睇中醫飲藥後濕疹仲嚴重咗，有人話係「發出嚟」嘅表現。到底中醫治濕疹方面，有無「發出嚟」呢回事！？

首先，我地要分清楚「濕疹嚴重咗」是否單純源自內服中藥。

曾經有一位病人，佢本身使用類固醇已經有好幾年時間。轉食中藥後，本身無濕疹嘅地方都開始泛紅同出現痛楚。開頭以為係所謂嘅「發出嚟」，但同醫師溝通後發現，有機會係因為停止使用類固醇，而出現戒斷類固醇嘅併發症。

呢個情況，「濕疹嚴重咗」呢個表現就有機會唔係源自醫師處方嘅中藥。但點解有啲病人從未使用類固醇，但飲左中藥後仍然有嚴重咗嘅情況？

中醫的確有「發疹」或「發散」嘅治療方法，但只係用於部分熱病、皮膚過敏病症或者濕疹急性發作。可以想像一下病邪聚集在體表，但皮膚腠理因病邪而鬱閉，令病邪離開唔到身體。例如身體好熱但出唔到汗、皮膚熱熱紅紅但又唔出疹，呢啲就係需要發出嚟嘅「表實證」。

係治療慢性濕疹上，大部分都屬反覆皮膚乾燥、痕癢、脫屑、滲液為主。針對此類病症，發散並非主要治法，更大可能係病人對某種中藥過敏。

濕疹患者大多屬於過敏體質，部分會伴隨食物過敏、哮喘、過敏性鼻炎等病症。很有可能病人對例如蟲類嘅中藥過敏而不自知，而偏偏呢類藥係常用於治療皮膚痕癢嘅。

潘醫師自己嘅濕疹病人，大部分嘅病徵都係逐漸消退嘅，比較少見到突然加劇嘅情況。假如患者出現病情惡化嘅現象，可以積極同醫師配合，調整處方。