健康資訊

周身唔聚財!亞健康「冷氣病」7種病徵

成日周身唔舒服,又講唔上係咩病!陳泳豪註冊醫師教你認識夏天亞健康「冷氣病」,一齊黎下自己中咗幾多項。

「冷氣病」同外國嘅Sick Building Syndrome相近,指長時間停留係辦公室或冷氣環境,而出現嘅一系列身體症狀,包括腰酸骨痛、頭暈暈、口唇乾燥、心口壓住唔舒服、 手腳冰冷、精神唔集中等,甚至出現啲過敏症狀,例如鼻敏感、皮膚乾燥搔癢。

導致「冷氣病」嘅成因有好多種,我地可以簡單分為:

  • 室內空氣質素(如溫度、濕度、塵蟎等);
  • 室內燈光(太光/太暗);
  • 室內環境化學殘留(如甲醛、漂白水、殺蟲水、空氣清新劑等)。

從中醫學角度解釋,夏天天氣炎熱,人體皮膚腠理就會打開嚟排汗降溫。當進入冷氣環境之後,腠理汗孔未趕得切關上,冷氣呢類風寒之邪就會乘虛而入,侵犯人體。

健康嘅人因為正氣充足,就可以抵禦呢啲外邪而唔會發病。相反,如果我地休息唔夠、過度疲勞,則容易正氣不足而出現「冷氣病」啦!

雖然工作環境冷氣幾大我地改變唔到,我地亦都有方法自救!

首先,人嘅「頭、頸、背」等都係陽氣集中及督脈遁經嘅部位,我哋可以戴帽、頸巾或披肩,或者調較風位避免直接吹到呢啲部位。同時,喺office做野做到咁上下就要起身郁下活動下,Lunch Hour可以去附近公園行下坐下,吸收陽氣。

除此之外,我哋亦都可以進行天灸療法,去改善虛寒疾病。天灸療法會喺全年最熱嘅「三伏天」時候,利用辛溫助陽嘅藥物,磨碎後敷貼喺人體特定的穴位上。透過刺激局部穴位激發經絡,可以調整人體氣血陰陽平衡,增強人體抗病能力。天灸療法對於長期坐係冷氣房而出現嘅手腳冰冷、鼻敏感、腰酸骨痛等等嘅症狀,有明顯嘅療效。

Author : 陳泳豪 註冊中醫師

香港大學中醫學碩士(內科)畢業,曾就職於醫院管理局三方協作中醫診所,豐富臨床經驗,專研肺系病(咳嗽、哮喘、鼻敏感)、脾胃問題(胃病、食慾不振、便秘、泄瀉、腸易激綜合症)、皮膚科(蕁麻疹、玫瑰痤瘡)。 學歷豐富,包括香港大學中醫學碩士(內科)、香港大學中醫全科學士學位、香港理工大學綜合康復治療課程、香港大學家庭醫學及基層醫療學系社區精神醫學證書課程、香港老年學會實用老年病學證書課程、香港急症醫學會緊急醫學課程、香港中文大學專業進修學院腫瘤學證書課程、香港大學專業進修學院經方臨床應用培訓課程。

發佈留言

發佈留言必須填寫的電子郵件地址不會公開。 必填欄位標示為 *