玫瑰痤瘡VS暗瘡大不同 誤判隨時加重病情
雖然同樣會出現皮膚泛紅、粉刺膿瘡、病情反覆嘅病徵，但玫瑰痤瘡與暗瘡（專稱痤瘡）屬於截然不同嘅病！如果錯誤地將玫瑰痤瘡判斷為暗瘡，治療方案分分鐘變成加劇病情嘅兇手！
❓什麼是玫瑰痤瘡❓
玫瑰痤瘡係一種皮膚病，因為控制面部血管嘅神經系統失調，以致面部血管過度充血，引起紅斑同微絲血管擴張，令面部皮膚反覆出現以下情況：
1. 泛紅灼熱、腫脹刺癢、乾燥甩皮、皮膚繃緊；或
2. 出現紅斑或微絲血管擴張；或
3. 出現粉刺膿瘡；或
4. 出現皮膚增粗變厚；或
5. 眼部異物感、視力變得模糊、眼睛乾澀搔癢刺痛等。
❓發病時是什麼感覺❓
唔少病人初次發病時，感覺好似有道熱氣湧到臉上，開始有面部泛紅，但因為無粒粒就以為係皮膚敏感。初時隔一陣間就會退，因此未有留意及避開會令病情加重嘅因素。後來容易演變到開始生粒粒，就以為係暗瘡。 如果用手去擠丘疹或者做美容針清，會更加刺激皮膚，加重泛紅情況。如果手唔乾淨，甚至有機會感染化膿！所以，要搞清楚暗瘡同玫瑰痤瘡嘅分別，先能夠對症下藥，否則會弄巧反拙！
❓暗瘡和玫瑰痤瘡的不同之處❓
暗瘡多數伴隨黑頭和白頭等毛孔閉塞情況，而皮膚的微絲血管狀態也較玫瑰痤瘡安定。相反，如果你嘅皮膚喺無誘因嘅情況下出現陣發性泛紅，受溫度、情緒、紫外線等因素影響，甚至持續出現面部紅斑，同時伴隨上面1 – 5嘅其中一項，就好大機會屬於玫瑰痤瘡啦！
❗中醫治玫瑰痤瘡❗
從中醫學角度分析，玫瑰痤瘡好發嘅部位主要以胃經、大腸經為主，面部又喺「諸陽之會」，一旦臟腑氣血運行不暢，血熱鬱滯肌膚，就會令面部皮膚出現紅斑、烘熱腫脹，情況耐咗就會出現粉刺膿瘡。 另一方面，呢個病又以女士多見，中醫學認為「女子以肝為先天，以血為重」，女士容易出現肝腎不足，虛火上炎嘅情況，亦會令皮膚出現乾燥繃緊，眼紅乾澀等症狀。 中醫治療上以中藥內服為主，醫師會按照病人皮膚情況，搵出疾病嘅根本問題喺邊度，再處方合適藥物。由於每個患者嘅情況不盡相同，唔同時期玫瑰痤瘡嘅治療策略又有唔同，所以大家唔好胡亂搵偏方嘗試，最後可能得不償失。
❗個人護理小貼士❗
玫瑰痤瘡嘅症狀好多時會因為以下情況而加重：
- 日曬、天氣寒冷、悶熱環境、環境溫差轉變太大、乾燥大風環境等；
- 飲食不節，如熱食、辣椒、咖哩、酒精、咖啡濃茶等；
- 運動；
- 情緒、工作壓力，勞逸失調；
- 化妝品或護膚品對皮膚的刺激；
- 藥物影響。
個人皮膚保養對於玫瑰痤瘡患者嚟講喺十分重要，以下有幾個貼士比受到玫瑰痤瘡影響嘅朋友：
- 夏天冷氣唔好開太大，一來冷氣容易抽乾皮膚水份，二來可以避免出入室內室外環境時溫差太大，刺激皮膚。
- 避免冷風、冷水及熱水直接接觸面部，尤其喺皮膚灼熱嘅時候以冰水敷面，或者用太熱嘅水淋浴，會好容易加重病情架。
- 盡量減少使用化妝品及面膜，選擇不含防腐劑、香料同埋添加劑嘅護膚品，做好保濕同防曬，避免日光刺激面部。同時亦要避免過度清潔面部，選擇溫和同低刺激性嘅洗面用品，或者簡單以室溫清水洗面就可以。
- 日常生活中，患者要作息定時，減輕壓力，減少情緒波動，保持心境開朗，可以透過一啲輕量嘅運動嚟放鬆心情，但要避免劇烈運動。
有啲活動並唔適合玫瑰痤瘡做架，包括焗桑拿、浸溫泉、蒸面、甚至乎高溫瑜伽，呢啲都喺高危活動，容易導致病情加重。
飲食上，要避免含酒精嘅飲品同食物、辛辣刺激性嘅食物同埋忌食一切可能引起過敏之食物：
- 過敏食物包括:貝殼類海產(如蝦蟹)、牛肉、筍、冬菇、堅果等；
- 刺激性食物飲品包括：香菜、薑蔥蒜、奶茶、功夫茶、酒、辛辣(辣椒，咖哩，胡椒，花椒等)；
- 食物均待溫涼，忌滾燙食物，避免火鍋、燒烤等。
