健康資訊

脫髮唔係男士專利!節食減肥可致脫髮!

夏天就快到,又到咗減肥嘅季節。不過疫情關係,健身室同好多運動設施都無開。如果女士們選擇節食呢個方法搣走脂肪,就要注意!節食嘅代價竟然喺「脫髮」!

原來,過份節食減肥,會導致營養不良、氣血不足。頭髮會失去滋養,出現疏落易斷嘅情況,嚴重者可能會導致脫髮。

我哋頭髮嘅生長週期大約為2 – 5年,正常每日會甩大概50 – 100條頭髮。喺頭髮脫落之後,原先嘅毛囊就會再長出新嘅頭髮,重新開始另一個生長週期。成年人大概有10萬條頭髮,就好似一個森林一樣,如果你希望頭髮能夠健康生長,關鍵就係要保持「土地肥沃」!

中醫學認為,「肝藏血、髮為血之餘」、「腎藏精、其華在髮」,人體臟腑血氣充足,頭髮就可以得到充足滋養,先會生得烏黑濃密;而隨住年紀愈大,臟腑氣血日漸不足,我哋嘅頭髮就會開始疏落、變白、失去光澤。如果頭髮提早開始疏落、脫髮增多、皮屑增多、頭皮瘙痕等症狀,就要注意呢啲身體比我哋嘅警號啦。

脫髮有2種常見證型:(1) 肝腎不足、(2)脾胃濕熱;其中肝腎不足型以女性較多,脾胃濕熱型則男性稍多,但男女比例相差不遠。

肝腎不足:肝腎為頭髮生長之源,肝腎功能好則毛髮光澤。肝腎不足,則不能濡養頭髮,造成脫髮問題。

脾胃濕熱:脾主運化,為後天之本。常因後天飲食失衡令脾胃運化欠佳,影響了皮膚,使油脂分泌旺盛,造成頭髮生長環境受阻。

兩種證型均有先天或後天嘅因素,亦有機會同時出現。醫師透過辨症論治,可以針對下藥,再按病情需要配合針灸,能夠有效改善脫髮嘅情況。

此外,醫師亦可以按病人體質處方中藥,改善病人消化系統功能,配合耳穴按壓,幫助病人回復窈窕體形,不再依賴節食減肥。咁大家就可以保持頭髮健康,同時keep住個靚身形啦!

Author : 陳泳豪 註冊中醫師

香港大學中醫學碩士(內科)畢業,曾就職於醫院管理局三方協作中醫診所,豐富臨床經驗,專研肺系病(咳嗽、哮喘、鼻敏感)、脾胃問題(胃病、食慾不振、便秘、泄瀉、腸易激綜合症)、皮膚科(蕁麻疹、玫瑰痤瘡)。 學歷豐富,包括香港大學中醫學碩士(內科)、香港大學中醫全科學士學位、香港理工大學綜合康復治療課程、香港大學家庭醫學及基層醫療學系社區精神醫學證書課程、香港老年學會實用老年病學證書課程、香港急症醫學會緊急醫學課程、香港中文大學專業進修學院腫瘤學證書課程、香港大學專業進修學院經方臨床應用培訓課程。

發佈留言

發佈留言必須填寫的電子郵件地址不會公開。 必填欄位標示為 *