健康資訊

夏天容易積聚脂肪?6種中藥Superfood消脂減肥!

踏入夏天第二個節氣「小滿」,天氣會越黎越悶熱,削弱身體脾胃運化功能,使體內濕氣漸多,造成水腫或脂肪積聚。炎炎夏日大家都想去海灘大曬身材、享受陽光,點可以俾肚腩仔影響市容呢?所以今日潘醫師想同大家講下夏天常見嘅都市病—「肥胖症」。

要判斷自己是否屬於肥胖,最好嘅方法就喺用現代醫學嘅角度去診斷。BMI體重指數 (Body Mass Index) 喺現時國際最常用嘅指標。適用於所有 18 至 65 歲人士,但孕婦、正在哺乳嘅女性同埋身形健碩嘅運動員就不適用。

計算方法為以體重(公斤)除以身高(米)嘅二次方,得出嘅比值就喺體重指數(BMI)。以亞洲成年人為例,BMI<18.5 屬消瘦;BMI 在 18.5-22.9 屬正常體重;BMI 在 23-24.9 屬超重;BMI 在 25-29.9 屬肥胖,BMI>=30 屬極肥胖。

喺中醫學嘅角度,「肥胖症」主要成因喺先天不足或年紀漸大造成脾腎功能失調,加上飲食不節、情緒不暢、缺少運動,導致人體正氣虛衰、陽氣虛損、脾胃失調,身體產生痰濁、水濕、氣滯或血瘀情況。

中醫治療「肥胖症」,會從「益氣健脾、化痰利濕、消食導滯」呢幾個方向着手。透過「望、聞、問、切」四診,醫師會喺病人身上收集「證據」,然後判斷出病人屬於「肥胖症」嘅邊個證型,再用中藥,配合針灸同拔罐,效果相當顯著。

根據以下資料,大家可以睇睇自己可能屬於中醫學入面「肥胖症」嘅邊種證型:

1) 脾虛濕阻
證候:肥胖而浮腫,冇精神,週身無力,腹脹無胃口,尿少大便爛,舌質淡,脈細滑或弦細。
治法:健脾化濕。

2)胃熱濕阻
證候:成日肚餓,腹脹,口乾鍾意飲水,大便秘結,頭暈頭脹,舌質紅,苔薄黃或白,脈弦數或弦滑。
治法:清胃泄火。

3) 肝氣鬱結
證候:胸脅苦悶,煩燥易怒,胃脘脹,多噯氣,腹脹無胃口,月經失調,舌苔膩,脈弦。
治法:疏肝解鬱。

4) 痰濁中阻
證候:身體肥胖,平時鍾意食肥膩煎炸,頭暈頭脹,腹脹胸悶,四肢重墜感,手腳麻痹,咳吐黏痰,舌苔白膩或黃膩,脈滑。
治法:健脾化痰。

5) 脾腎陽虛
證候:體胖肢冷,喜暖怕凍,神疲乏力,腹脹無胃口,腰膝痠軟,肢體浮腫,尿少大便爛,舌淡苔薄,脈沉細弱。
治法:溫腎健脾。

下面推介啲消脂減肥嘅「中藥superfood」俾大家:

1) 山楂 – 消食導滯
山楂擅長化食過多肉食後而發生嘅積滯,促進脾胃消化。但胃炎、消化系統潰瘍及孕婦慎用。

2) 海帶 – 消痰利水
有軟堅散結、消痰利水作用,亦能使人消瘦。海帶對甲狀腺功能低下引起嘅肥胖有較好嘅作用, 但甲狀腺功能亢進人士忌用。記得服食海帶後唔好飲茶或食酸野,否則會妨礙鐵質嘅吸收。

3) 冬瓜 – 利水消腫
有利尿消痰、清熱解毒嘅功效,有較好嘅減肥作用。由於肥胖人士多有內熱,冬瓜嘅下氣、清熱,有助於減肥,可以長期大量服用。

4) 普洱茶葉 – 健脾消食
普洱茶葉具健脾消食、消脂嘅功效,主治肥胖、間中作嘔、食滯或咳嗽痰多等症侯。

5) 決明子 – 潤腸通便
又名草決明,兼有清肝明目嘅作用。決明子甘寒質潤,能潤滑大腸而通便。適用於大便燥結或容易便秘嘅人士,但平素易泄瀉或低血壓人士慎用。

6) 山藥 – 滋陰健脾
又名淮山,既補脾氣,又滋脾陰,適用於脾胃氣陰不足而出現無胃口、體倦、大便爛等人士。但養陰易生濕,故濕氣過重或有積滯人士不宜食用。

Author : 潘健燊 註冊中醫師

海外回流註冊中醫師,畢業於香港中文大學中醫全科碩士學位,具豐富臨床經驗。專研內科中藥調理、痛症針灸及浮針治療、婦科、情志病、皮膚科等。臨床研究範疇包括:針灸治頭痛、坐骨神經痛、肌肉扭傷、關節炎、腸胃不適、婦科(經前緊張症候群、月經不調、痛經、功能性子宮出血、白帶異常、妊娠嘔吐、閉經)、情志病(鬱證、失眠)。

發佈留言

發佈留言必須填寫的電子郵件地址不會公開。 必填欄位標示為 *