健康資訊

生痱滋持續幾個月 中藥幫唔幫到手?

好多病人生痱滋生係舌面舌底,而且一生就幾個月,好易復發,實在係好折磨人嘅事。嚴重嘅情況,真係痛到食唔落野、頭痛、甚至影響睡眠等。

「痱滋」又稱口腔潰瘍、口內炎或口瘡。西醫學角度,生活壓力過大、情緒焦慮抑鬱、長期熬夜等,種種因素都有機會造成自律神經失調、免疫力下降,促成口瘡嘅發生。

而喺中醫學嘅角度,導致口瘡嘅原因分為「實熱」同「虛熱」。

「實熱」係由於飲食不節或作息唔定時而導致脾胃實熱,起病急而病程較短;「虛熱」係由於脾胃本身虛弱,中氣不足,氣虛陽浮,病程長,病情遷延難愈。

據臨床觀察,大部分香港人嘅復發性口瘡主要病因都屬於「虛熱」。

潘醫師其中一個典型嘅病例,症狀多為屬「熱」:生口瘡嘅位置會灼熱疼痛、伴有口乾口苦、大便不爽等。但係詳細問診之後,發現原來病人係有虛熱嘅症狀,包括:每次復發都係捱完夜或壓力爆煲之後、食生冷食物後就會出現腹瀉、伴有經常胃脹、胃氣多嘅情況。

呢位病人飲左兩日藥,痛咗一個月嘅痱滋就無再痛啦。對於呢類虛實夾雜嘅病機,我地唔可以淨係清熱、飲廿四味,否則只會令虛火更易上浮。

我會用補中益氣、降火清胃、解毒止痛嘅藥物,既可快速止痛、加快癒合,又可預防下次復發。

想預防生口瘡,喺飲食方面,除左要戒辛辣、煎炸、肥甘厚味嘅食物外,亦可以多食含維生素B2嘅天然食物,包括蘑菇、海帶、紫菜、豬肉、雞蛋。現代研究發現維生素B2能有效促進潰瘍癒合,維護粘膜既完整性。

Author : 潘健燊 註冊中醫師

海外回流註冊中醫師,畢業於香港中文大學中醫全科碩士學位,具豐富臨床經驗。專研內科中藥調理、痛症針灸及浮針治療、婦科、情志病、皮膚科等。臨床研究範疇包括:針灸治頭痛、坐骨神經痛、肌肉扭傷、關節炎、腸胃不適、婦科(經前緊張症候群、月經不調、痛經、功能性子宮出血、白帶異常、妊娠嘔吐、閉經)、情志病(鬱證、失眠)。

發佈留言

發佈留言必須填寫的電子郵件地址不會公開。 必填欄位標示為 *