健康資訊

陰虛火旺型暗瘡

傳統中醫學認為臉上皮膚主要由肺經同胃經所主管,所以生暗瘡係由於肺胃血熱所致。但喺臨床上,我認爲「陰虛火旺」都喺生暗瘡一個重要嘅病機。

陰虛火旺型嘅暗瘡顏色紅而無乜膿,兼會口唇乾燥、口渴、兩顴潮紅,自覺身熱。幻想下我哋人體入面有團火同埋有碗水,當我地碗水唔夠滿,就係中醫成日講嘅「陰虛」。而當碗水唔夠,團火就相對較旺,造成「陰虛火旺」嘅症狀。火鍾意向上走,所以「陰虛火旺」嘅人就容易生暗瘡。

造成「陰虛」嘅原因好多,而對於香港人,最常見就係夜訓、工作壓力過大、房勞過度、同埋成日食辛辣煎炸食物。生呢種暗瘡嘅朋友平時適合食多啲滋陰降火既食物,包括雪耳、生地、螺頭、墨魚、沙參、玉竹、淮山等。千祈唔好一味清熱,亂飲涼茶,越飲越虛,虛火越勁,暗瘡爆得越厲害!最好都係搵番您信任嘅中醫師去辨證開藥變靚啲。

Author : 潘健燊 註冊中醫師

海外回流註冊中醫師,畢業於香港中文大學中醫全科碩士學位,具豐富臨床經驗。專研內科中藥調理、痛症針灸及浮針治療、婦科、情志病、皮膚科等。臨床研究範疇包括:針灸治頭痛、坐骨神經痛、肌肉扭傷、關節炎、腸胃不適、婦科(經前緊張症候群、月經不調、痛經、功能性子宮出血、白帶異常、妊娠嘔吐、閉經)、情志病(鬱證、失眠)。

1 thought on “陰虛火旺型暗瘡

發佈留言

發佈留言必須填寫的電子郵件地址不會公開。 必填欄位標示為 *