陰虛火旺型暗瘡

陰虛火旺型暗瘡

傳統中醫學認為臉上皮膚主要由肺經同胃經所主管，所以生暗瘡係由於肺胃血熱所致。但喺臨床上，我認爲「陰虛火旺」都喺生暗瘡一個重要嘅病機。

陰虛火旺型嘅暗瘡顏色紅而無乜膿，兼會口唇乾燥、口渴、兩顴潮紅，自覺身熱。幻想下我哋人體入面有團火同埋有碗水，當我地碗水唔夠滿，就係中醫成日講嘅「陰虛」。而當碗水唔夠，團火就相對較旺，造成「陰虛火旺」嘅症狀。火鍾意向上走，所以「陰虛火旺」嘅人就容易生暗瘡。

造成「陰虛」嘅原因好多，而對於香港人，最常見就係夜訓、工作壓力過大、房勞過度、同埋成日食辛辣煎炸食物。生呢種暗瘡嘅朋友平時適合食多啲滋陰降火既食物，包括雪耳、生地、螺頭、墨魚、沙參、玉竹、淮山等。千祈唔好一味清熱，亂飲涼茶，越飲越虛，虛火越勁，暗瘡爆得越厲害！最好都係搵番您信任嘅中醫師去辨證開藥變靚啲。